#

МАКТУБ

Садоқатсиз ёри ваъдасига вафо қилмай, дўстига турмушга чиққанини эшитиб. ҳаётдан ихлоси қайтган бир зобит йигитнинг сарсон юрган ишончи ю умидини тасодифий мактуб қайтарди. Кўнгли бир ҳамдардга зор йигит унга жавоб ёзди. Гарчи улар бир-бирини танимасада, ўзаро мактуб алмашарди. Шу тариқа, у қиз билан бир йил хат ёзишди. Зобит мактубларни қадрлар ва ўша нотаниш қизсиз яшай олмаслигини ҳис қиларди. Иккиси бир-бирини кўрмаган бўлсада, ўртада кучли муҳаббат туғилди.
Зобитнинг хизмати якунига етгач, улар марказий вокзалда кўришишга аҳд қилди. Бир-бирини таниб олиш учун қиз оппоқ кийимда бир дона атиргул кўтариб чиқишини айтди. Йигит йўл бўйи ўйланиб кетди: у қизнинг суратини сира кўрмаган, ҳатто неча ёшдалигини, семиз ё ориқлиги, гўзал ё хунуклигини билмайди. Шундай бўлсада, усиз яшолмаслигини биларди.
Йигит вокзалга келиб, уни кута бошлади. Белгилаганларидек, соат бешга бонг ургач, у кўринди. Бир дона атиргул кўтарган оқ либосли аёлнинг ёши тахминан олтмишларда эди. Йигит аёлни кўрибоқ ортига ўгирилди. Шу заҳоти қайтиб кетишни ўйлади, аммо кетолмади. У уч йил ичида қадрдонга айланган аёлни ташлаб кетолмасди. Ахир у умидсиз кунларида мадад бўлди. Байрамларда совға жўнатди. Учрашиш ёди билан яшашга ундади. Бундай аёл ҳар қандай эъзозга лойиқ! Йигит дарҳол унинг қаршисида пайдо бўлди ва тиз чўкиб, қўлидан ўпиб кўришди. Кекса аёл кулиб қўйди ва ортида беркиниб турган қизга имо қилди:
— Адашдингиз, яхши йигит, мана, ҳақиқий муҳаббатингиз!
Йигит унга уялиб боқиб турган ўзи билан тенгқур гўзал бир қизни кўрди ва ажабланди. Кекса аёл унга тушунтирди:
— Неварам ўз ўрнига учрашувга чиқишимни сўраганди. Агар мени кўриб кетиб қолганингда, бари бошланмай тугарди.
Йигитнинг муҳаббати ҳақиқийлигига ва уни ҳеч қачон ташлаб кетмаслигига ишонган қиз унга қўлларини узатди. Иккиси узоқ ва бахтли ҳаёт кечирди.

#Boshqalar#53#maktub
O'xshash hikoyalar
Ehtirosli.ru   Яндекс.Метрика